Social Icons

Saturday, December 15, 2012

හිතුවේ නැහැ මං




අප ආ ගිය මග
ආයෙත් සැරයක්
පුරුදු සිනාවෙන්
කෙදිනක හෝ යළි
යන්න ලැබේ යැයි
සිතුවේ නැහැ මං...


බිදක් තරම්වත්
වෙනස් නොවී ඇති
ආදර ඔබෙ වත
හුස්ම පොදක
පමණක් කෙටි දුරකින්
කෙදිනකවත් යළි
දකින්න වේ යැයි
සිතුවේ නැහැ මං...


නැවතත්
ජීවත් වෙනවා මෙන්
මම
දැනුනෙ පින්බර
සිනාවකින්...
මියැදී තිබු හිත 
පුබුදු වුනේ ඔබේ 
දෑතේ පැටලුනු 
මගෙ දෑතින්...


- නිරෝෂ් මෛති‍්‍ර -
   2012/12/15



Thursday, November 22, 2012

මගේ උගත් පෙම්වතී



"...මිනිස් ජීවීන්ගේ හැඟීම් කි‍්‍රයාත්මකවන ආකාරයට බලපාන ප‍්‍රධාන සංයෝගයන්ගේ එක් මූලයක් මෑතකදී සොයාගෙන ඇති බව දොස්තරවරු ඈට කීහ. එය 'සෙරොටොනින්' යනුවෙන් හැදින්වේ. කරන කියන කටයුත්තක් ගැන අවධානය යොමුකිරීමට, කෑමට බීමට, නිදාගැනීමට සේම ජීවිතය රසවිදීමට පවා නොහැකිවීම මේ කියන 'සෙරොටොනින්' අඩුකම නිසා සිදුවන්නකි. මේ මූලද්‍රව්‍යය සහමුලින් නැතිවූ කල හිතේ මළානිකකම ඇතිවේ. අශුභවාදය රජකරන්නට පටන්ගනී. කරන සියල්ල නිරර්ථකය යන හැඟීමට ගොදුරුවේ. විඩාව, කාන්සාව, අතීරණය පිරි තිමිරයෙන් වැසුණු සාදාතනික දෝමනස්සයට යටවේ. එක්කො සියල්ල එපාවූ නීරස මනෝභාවයට නැත්නම් සියදිවි නසාගැනීමට අවසානයේ කෙනෙකු පෙළඹෙන්නේ මේ මනෝභාවය හේතුවෙනි... "
පාවුලෝ කොයියෝ -


අතිශය සංකීර්ණ සමාජයක ජීවත්වන අපට හමුවන විවිධාකාර මිනිසුන් අතර යම් කිසි විශේෂයක් ඇති පුද්ගලයන් පමණක් අපෙගේ මතකයේ රැදෙනවා. එයිනුත් මතකයේ විශේෂයෙන් රැදෙන්නේ ජීවිතයට විශේෂ යමක් එක්කල පුද්ගලයන් හා ජීවිතයම එපා කල පුද්ගලයින් පමණි. එයිනුත් කාන්තාවට හිමිවන්නේ කෙතරම් විශේෂිත ස්ථානයක්ද ? එයිනුත් ඇතැමෙක් සදාකල් මතකයේ රැදෙන ආදරණීය, ධනාත්මක හැඟීම් ඉතිරිකර යන අතර ඇතැමෙක් මතක් කලත් ඉතිරි වෙලා ඇති ලේ ටිකත් පුච්චලා දැමීමට සමත් වෙනවා.

දුක, ශෝකය, අහිමිවීම, ආර්ථික අපහසුතා, සැකය, සාංකාව ගැන නිතර කියවන කෙනෙකුන් සමග සදාකල් එකට ජීවත්වීමට සිදුවුවහොත් ඇතිවන තත්ත්වය කෙසේදැයි අනුමාන කිරීම කිසිවෙකුටත් අපහසු නොවනු ඇත. මේ සියල්ලටත් වඩා එම පුද්ගලයා බොරුකාර ජීවිතයක් ගෙවන්නෙකු නම්...


"...ආදරය සම්බන්ධයෙන් වූ වැරදි අවබෝධයන් අතර වඩාත් පොදු අදහස වන්නේ, ආදරය යනු අනෙකකු මත යැපීම හෝ රදාපැවැත්ම යන්නය. මෙලොව සිටින ඕනෑම පුද්ගලයෙකු තමාට මෙන්ම අන්‍යයන්ට ඇඟවීමට උත්සහ දරන්නේ අපට හැඟීම් හා අවශ්‍යතා ඌනතාවයක් නොපවතින බව හා අනෙකකු මත යැපීමට කිසිදු අවශ්‍යතාවයක් නොවන බවය. එසේ උවද අප සැම කි‍්‍රයාකරන්නේ කුඩා දරුවෙකු සුරතල් වෙමින්, අනෙකකු මුළු හදින්ම සැබෑ ආදරයෙන් හා අප ගැන උනන්දුවෙන් තමන් ගැන සොයා බැලීමක් කල යුතුය යන සිහිනය තුළය. සිහිනය සිහිනයකි. සැබෑව සිහිනයට පිටස්තරය. අප මානව ධර්මතාවයන්ට කොතෙක් ගෞරවයෙන් කටයුතු කලද සිහිනය අනවශ්‍ය තරමට විශ්වාස කල විට අහසින් පොළවට පතිත වන්නේ අනපේක්ෂිතවය. සිහිනයක් අප දෙනෙත ඉදිරිපිටනම්, අප වහාම පියවි සිහිය උවමනාවෙන් අවදිකල යුතුය. පියවි සිහිය නැතිවන මොහොත තුළ අපව සොරකම් කර ගැනීම කවරෙකුට උවද පහසුය..."
- ආචාර්ය ස්කොට් පෙක් -

ආචාර්ය ස්කොට් පෙක්ගේ කියමන සිහියට නැගුනේ මීට සති කිහිපයකට පෙරය. එදිනම මේ සටහන තැබීමට අවශ්‍ය උවත් පැවති කාර්යබහුල තත්ත්වය නිසා එය මග හැරුණි. එනම් පියවි සිහිය තොර කරගත්තෙකු මුණ ගැසුනා මදිවට ඇය මගේද පියවි සිහිය නැති කරන්නට ගත් උත්සහයක් නිසාය. මගේ කීමකට වඩා ආචාර්ය ස්කොට් පෙක්ගේ කියමනක් යොදා ගත්තේ ඇයගේ සුවපහසුව පිණිසමය. මන්ද යත් ඇය මටත් වඩා පොත පත පරිශීලනය කරන පොත් කියවා එහි සිටින මිනිසුන් සැබෑ ජීවිතයේ සොයන කෙනෙකුන් නිසාය.

මේ සටහන තුළින් මට කිවයුතුව ඇතිදෑ බොහොමයක් උවත් සියල්ල කාලය විසින් මෙතෙක් කලක් තීරණය කලාසේම ඉතිරියද කාලයටම බාරදීම යහපතියි මම විශ්වාශ කරමි. මන්ද මෙම සටහන අදාල සිදුවීම් දාමය වඩාත් විශ්ලේශනය කරන තැනකට තල්ලුවුවහොත් ගඳ ගසන කුණු ගොඩක් හිතාමතාම ඇවිස්සුවාට සමාන වනු ඇත. අතීතයෙන් පාඩම් ඉගෙන නොගන්නා එකා සදාකල් එකතැන පල්වන්නාක් බව මා කොහෙන්දෝ අසා ඇත. මාත් සමග සම්බන්ධකම් පැවැත්වූ කිසිවෙකුගේ චරිත කිසිම අවස්ථාවකදී ඝාතනය නොවන්නට මෙතෙක් වග බලාගත්තා සේම, එය ඉදිරියටද එසේමය. එය දැන දැනම හෝ දැන ගත්තද ගොං මොළයකට නොතේරෙන තැනක සිට කරන බාල වර්ගයේ චෝදනාවලට මා කිසිවිටක උත්තර බැදීමට ඉදිරිපත් වන්නේද නැත. අනෙක එකම කාරණය පිළිබද වරින් වර කරන අභූතයන් ගැන උත්තර දෙනවාට වඩා මට කිරීමට වෙන වැඩද ඇත. සාංසාරික බැදීමක් බලාපොරොත්තු වනවාට වඩා ළඟ සිටින පුද්ගලයාගේ විශ්වාසය රැකීමට පුරුදුවීම කාටත් වටී. එය සමාජ ජාල අඩවි වල රට්ටු හිනස්සන Status දමනවාට වඩා වැදගත් කාරණයකි. 

ඉස්සර වගේ හැම දෙයක්ම 
     ලස්සනට පේන්නෑ..
පේ‍්‍රමයේ සුවද තවදුරටත්
     අපෙන් හමන්නෑ..

සෘතු මාරුවෙලා,
     කටෝර හිරු එබෙන්න කළින්
දොර කවුළු සියලු,
     මුදා හරිමි පේ‍්‍රමයේ නමින්...

- ශ්‍රෝණි මේ කලා -
අරුණ පත්තිනිගේ


හුදෙක් මගේම පහන් සංවේගය තකා,
- නිරෝෂ් මෛති‍්‍ර -
2012/11/22








Tuesday, October 9, 2012

හැමදාම මල් පෙති ළං කලත්...



මැරුණ හිතක් අමාරුවෙන් හුස්මගන්න හදන සද්දෙ ඇහිලා තියෙනවද?
මට ඊයෙ ඇහුණා...
හැඟීම් මැරුණට පස්සෙ ඉන්නෙ කොයිවගේ මිනිහෙක්ද කියලා දැකලා තියෙනවද?
මම ඊයෙ දැක්කා...
ගොඩාක් සතුටින් ඉන්නවා වගේ පෙන්නන ඒත් අමුම අමු මළ කදක් එක්ක කතා කරලා තියෙනවද?
මම ඊයෙ කතා කලා...
එතන දැන් ජීවයක් නැහැ.
මම හිතන්නෙ ඌ දැන් ගන්ධබ්බයෙක්...


- නිරෝෂ් මෛති‍්‍ර -
- 2012/10/10 -


Sunday, October 7, 2012

ඇවිදින මළකඳ




මෙච්චර සතුටු වෙන්න
දේවල් තියෙද්දිත්,
සතුටක්,
නොදැනෙන හැටි...
දුක් වෙන්න
ඇති තරම් දේවල්
ඇගේ හැපි හැපි යද්දිත්
දුකක්
නොදැනෙන හැටි...
මම හිතන්නෙ
ඔයාව
වළලපු දවසේ
මාත්
මැරෙන්නැති...

- නිරෝෂ් මෛති‍්‍ර -
2012/10/07

Tuesday, October 2, 2012

ඔහු හා ඇය




ඔහු

* පත්තරේකට නිදහස් මාධ්‍යවේදියෙක් විදිහට ලිව්වා.
* අප‍්‍රසිද්ධ සමාජවාදී කල්ලියකට සම්බන්ධ වෙලා හිටියා.
* නිතර දේශපලනික පොත් බැලුවා.
* කාර්යාලයේදීත් කියෙව්වෙ ආණ්ඩුව විවේචනය කරලා තියෙන වෙබ් පිටු, බ්ලොග් පිටු.
* දවසකට දුම්වැටි දෙකක්වත් ඉරුවා.
* ලස්සන නිසදැස් ලිව්වා.
* ඒවයෙනුත් ගොඩක් ඒවා හරි බරයි.
* ඒ වගේම ඔහු රණ්ඩුවටත් බරයි.


ඇය

* ලස්සන ඇදුම් ඇන්දා.
* උදේට දැක්කම පන්සලක් දැක්කා වගේ හිතම පිරෙනවා.
* ප‍්‍රවෘත්ති කාමරේ වැඩි බරක් ඇද්දත් ඇය කවදාවත් දේශපාලනය ගැන කතා කරන්න ආසා උනේ නැහැ.
* ඉඩක් ලැබුන හැටියෙ සින්දු ඇහුවා.
* ඔන්ලයින් ගේම් ප්ලේ කලා.
* කොණ්ඩ මෝස්තර දාන හැටි යූ ටියුබ් එකෙන් බලාගත්ත අතේ බලන් හිටියා.
* කාර්යාලය දෙක වෙන්න හයියෙන් හිනා උනා.
* කන්න කැමති උනේ 'ටිපි ටිප්' වගේ පොඩිඋන් කන්න කැමති කෑම.


හැබැයි ඇය ඔහුට ගොඩක් ආදරේ කලා. හිතාගන්නවත් බැරි තරමට.
ඒ වෙනදෙයක් නිසා නෙවෙයි, ඔහුගෙ බරයි කියලා පෙන්නන ජීවිතය යට ඉන්නෙ ඇයටත් වඩා කුඩා දරුවෙක් බව ඇය හොදාකාරවම දැනන් හිටිය නිසා...


- නිරෝෂ් මෛති‍්‍ර -
2012-10-02


Sunday, August 26, 2012

වෙහෙස දැනෙන මේ ජීවිතේ




සීත කාමරයක සිට,


ආදරණීය ඔබට,

            ඔහේ ගිය ජීවිතය ලස්සන එක තැනක නැවතුනේ ඔයා නිසා. මම ඒ තැනට ගොඩක් ආසා කලා. ඊටත් වඩා ආදරේ කලා. අවසානය ලස්සනට ඉවරවෙන ලස්සනම ලස්සන කතාවක් නෙවෙයි මේක කියලා දැන දැනත් තව තවත් ආදරේ කලා. මටත් වඩා ඔයා. ඒත් අන්තිමේදි උනේ මම හිතපු මම බාරගන්න බලන් ඉදපු දුක හිතෙන අවසානයට වඩා වෙනස්ම එකක්. මතක් වෙනකොටත් මටම ලැජ්ජා හිතෙන එකක්. නමුත් මොනවිදිහෙන් උනත් අන්තිමට උනේ මට ඔයාව නැති උන එක. ඒ එකකටවත් මට ඔයාගෙන් සමාව ඉල්ලන්න තරම් හයියක් නැහැ. පුළුවන් කමකුත් නැහැ. ඒත් මම එක දෙයක් කියන්නම්, "මම ඔයාට හරිම ආදරෙයි, හැමදාමත්..."

ආශා නිරාශා මැවූ 
ඈ ස්වප්න මායාවකි
ස්නේහෙ ගඟුල්
පේ‍්‍රමේ තැවුල්
මැවූ ඉන්ද්‍රජාලේ ඇයයි...

ඇත්තටම ඔයාගෙ ආදරේ මට පුදුමයක්. ඊටත් වඩා හීනයක්. මොකද ඒ ටික කාලෙ ඇතුලත ඒ තරම් ආදරයක් වින්දද කියලා සමහර වෙලාවට මට විශ්වාස නැති නිසා. මට අසනීප උනාම ඔයා මාව බලාගත්ත හැටි, ඔයාගෙ අතින්ම මට හරිම ආදරෙන් කවපු හැටි, මම ඇක්සිඩන්ට් වෙලා ඉද්දි මගෙ හැමදේම ඔයා කරලා දීපු හැටි විතරක් නෙවෙයි, ප‍්‍රශ්න වලට හිනාවෙලා සැහැල්ලුවෙන් මූණ දෙන්න කියලා දීපු හැටි.. ඒ දවස් කොයිතරම් ලස්සනද.. ඔයා කරපු ඒ දේවල් මට වටින්නෙ වෙන මුකුත් නිසා නෙවෙයි, මම හොදාකාරවම දන්නවා ඔයා ඒ තරම් දේවල් කලේ කොයි තරම් ප‍්‍රශ්න මැද්දෙද කියලා. ප‍්‍රශ්නයක් ආවම බුම්මන් ඉන්න පුරුදුවෙලා හිටිය මම, අද කිසිම දෙයක් ඕනවට වඩා ඔළුවට බරක් කරගන්නැතුව හිනාවෙලා ඉන්න පුරුදු උනේ ඔයාගෙන්. අදත් මම කොයිතරම් දුකක් හිතේ හිරකරන් උනත් සතුටින් හිනාවෙලා ජීවත් වෙන්නෙ ඔයා පෙන්නපු පාරෙ යන නිසා. ඔයාව බලන්න මම මගට ආවම ඔයාගෙ මූණෙ ඇදෙන ලස්සන හිනාවට තරම් කිසිම දේකට මම ආස උනේ නැහැ. කලින් කියන්නෙ නැතුව ඔයා කැමති දෙයක් ගෙනත් දුන්නම ඔයා පුදුම වෙලා ඒ වෙලාවට හැසිරෙන හැටි මට කවමදාවත් අමතක නොවේවි. ඇත්තමයි..ඒතරම් ඔයාගෙ හැම ඉරියව්වක්ම මට හරිම ප‍්‍රියයි.

නීල දිලෙන නිම්නයේ
සුමුදු සයනයේ
නෙතු පියන් වැසී 
ස්වප්නයක්ද මේ තරම් පුදුමවූ
ඔබේ ආදරේ...
මේ සුරම්‍ය පාරාදීසේ
හදවතින් උමතුවූ
සදානන්ද කර සරාග
සුවද විජිතයේ...

අද මට ගොඩක් මහන්සියි. කෙලවරක් නැතුව දුවනවා, මොකට දුවනවද කියලා මමවත් දන්නෑ. ඒ මහන්සිය දරාගන්න බැරිතැනකට ආවම මුලින්ම මතක්වෙන්නෙ ඔයාව. ඔයත් එක්ක විනාඩි පහක්වත් කතා කර කර ඉන්න තිබුනනම් කියලා හිතෙද්දි පුදුමාකාර තනිකමක් දැනෙනවා. ඒත් එහෙමයි කියලා ඔයාගෙ ජීවිතේට ආයෙමත් මට එන්න පුළුවන් කමක් නෑ. මම දන්නවා ඔයා සතුටින් බව. හැමදාමත් එහෙම්මම ඉන්න. අර ලස්සන දඟකාර හිනාවත් මූණෙ තියාගෙන. මේ ලෝකෙ මට හම්බඋන ආදරණීයම හිත තියෙන්නෙ ඔයා ළඟ. ආදරණීයම හිත...

මා නොමැති හෙටක් නැතත්
පිපෙන මල් යළිත් පිපෙයි
හිරු එළිය ඇවිත් 

තව දවසක් උදාවෙයි...


යන්නම්...

ඔයාගෙම,

.................. 
- නිරෝෂ් මෛති‍්‍ර -
- 2012/08/26 -




 
 


Wednesday, June 6, 2012

අළුකල පෙම



සැළමුතු පෙමක
කෙළවර ඔබ
සිටියා ගව්
සියයක් දුරින්...
අළුකල පෙමක
සුන්බුන් රැගෙන
දුවයි සිත තවම
ඔබ යනෙන
මාවතේ...


පෙරදිනෙක මා හට
කිසිත් නැති දිනෙක
ඔබ ළඟින් උන්නා
බෝ සෙනෙහසින්...
ලෝකයම දිනා මම
අද හැරී බලන විට
ඔබේ සේයාවවත්
නොමැතිවිය
මා ළඟින්...


හිස් හැඟීම්
පිරුණු සිත
පොඩිකරන්
තෙරමින්
පීදෙනා මල් හැඟුම්
මගෙ පයට
පාගමින්
ජීවිතය ගෙවන්නම්
ඔබ තිළිණ කල
මළකදද සමග...


- නිරෝෂ් මෛති‍්‍ර -
2012/06/07

Saturday, May 19, 2012

සාරන්‍යා 06 - අවසාන කොටස

මෙතනින් (සාරන්‍යා 01) 
මෙතනින් (සාරන්‍යා 02)
මෙතනින් (සාරන්‍යා 03)
මෙතනින් (සාරන්‍යා 04)
මෙතනින් (සාරන්‍යා 05) 

මට සංජය පිළිබද ඇතිවූයේ කියාගත නොහැකි තරහවකි. උදේ පාන්දරම මගේ දවස කා දැම්මා පමණක් නොව ඔලුවද විකාර කර දැම්මේය. සංජය කරන බොරුව ගැන මට ඔහුගෙන්ම ප‍්‍රශ්න කරන්න හිතුනත් එය හොරාගෙ අම්මාගෙන් පේන ඇසීමක් වන නිසා ඔහුට කතාකොට පලක් නැත. අනෙක් අතට සාරන්‍යාගේ කතාද පරස්පරය. මට එක්වරම සිහියට ආවේ විමාෂාය. ඇය සාරාන්‍යාගේ හොදම යෙහෙළියයි. එම නිසාම මගේද ළඟම යෙහෙළියක වී සිටියද සැලකිය යුතු කාලෙකින් ඇයට දුරකථන ඇමතුමක්වත් දීමට නොහැකිවිය. මෙම ගැටළුව ලිහාගැනීමට හොදම කෙනා විමාෂා බැවින් ලැජ්ජාව පසෙකින් තබා ඇයට ඇමතුමක් ගත්තෙමි.

"හෙලෝ විමූ..."


"දෙයියනේ... තාමත් අපේ නොම්මර ඔය ෆෝන්වල තියෙනවා එහෙනම්.."


"හරි හරි.. නෝන්ඩියට කතා කරන්න ඕනෙ නෑනෙ. පහුගිය දවස්ටිකේ එකදිගට වැඩ විමූ, කාටවත් Call එකක්වත් දෙන්න බැරි උනා. කොහෙද ඉන්නෙ, campus එකේද? "


"නැහැ අකිල නිවාඩු නිසා යාළුවෙක්ගෙ ගෙදර ආවා. ඒක නෙවෙයි, මුලින් කියලා ඉමුකො තකහනියක් අපිව මතක් උනේ මොකද කියලා. මට proposal එකක්වත් ගේන්නද? අනේ රජෝ දැන්නම් ඒකට too late, අන්න අපේ ගෙදරින් මට එකක් හොයලා..."

විමාෂා සුපුරුදු හිනාව සමගින් එකදිගට පැවසුවාය. ඇයගේ කතුරු කටනම් තවමත් වෙනස්වී නැත.

"අනේ මේ.. උඹට proposal ගේන්න මගේ ඇස් වපරයි කියලා හිතුවද? මම ගත්තෙ නම් පොඩි පණිවිඩයක් දැනගන්නත් එක්ක.."


"ආ... ඒ කියන්නෙ මේ අපේ දුක සැප බලන්න නෙවෙයි call කරලා තියෙන්නෙ..
කමක් නැහැ.. කමක්නැහැ.. කියමුකො බලන්න මොකක්ද කියලා.."


"හැබැයි විමූ ඔයා මට කිසිම දෙයක් හංගන්නෙ නැතුව ඇත්තම කියන්න ඕනෙ.."


"ආ... ඒ මොකක් ගැනද? "


විමාෂාගෙ කෙලිලොල් හඩ වෙනස්විය. මෙය බරකර කීවොත් මට ඇත්ත කතාව දැනගැනීමට හැකිවන්නේ නැත.


"නෑ.. නෑ.. ලොකු දෙයක් නෙවෙයි, campus එකේ මගේ යාළුවෙක් කිව්වා සාරන්‍යාට boy කෙනෙක් ඉන්නවා කියලා ඒක ඇත්තද? එයාගෙන් කෙලින් අහන එක හරි නැහැනෙ, ඒකයි ඔයාගෙන් ඇහුවෙ.."


විමාෂා නිහඩය. ඇය මේ ගැන සහසුද්දයෙන්ම දන්නවා විය යුතුය.

"විමූ.."


"ඔයා අප්සෙට් ගන්නැත්තම් මම උනදේ කියන්නම් අකිල, හැබැයි සාරන්‍යාම මේක ඔයාට කියනකං හිටියානම් තමයි හොද, මොකද නැත්තම් සාරන්‍යාත් මම ගැන වැරදියට හිතයි.."


"නැහැ විමූ.. මට ලොකු දෙයක් දැනගන්න ඕනෙ නැහැ. මට දැනගන්න ඕනෙ අපේ එකා කිව්වෙ පචයක්ද කියලා දැනගන්න විතරයි.මොකද ඒකා ඉදපු ගමන් හෙන බේගලුත් අතඅරිනවා"


මට අවශ්‍යවූයේ මෙය මට ඒතරම් ප‍්‍රශ්නයක් නොවන බව විමාෂාට ඇගවීමටය.

"හ්ම්... ඔයා දන්නවා නේද සංජය අයියාව? "


"ඔවු..  සාරන්‍යා මට ඒ දවස්වල ඉදන්ම කියලා තියෙනවා, රැග් සීසන් එකේදී සාරන්‍යාව ෂේප් කලෙත් සංජයනෙ.."


"ඔවු එයා තමයි. සාරන්‍යා සංජය අයියාට කැමති උනා.."


හද ගැස්ම වැඩිවූයේ ඇයිදැයි මමම නොදනිමි.


"ළඟදීද? "


මෙතෙක්වෙලා පූර්විකා දුන්නේ මේ ප‍්‍රශ්නය ඇසීමටයි.


"නැහැ.. අපි Batch Trip එක ගියපු දවසෙ.."

මම නිරුත්තර වීමි. මෙය විශ්වාස කල හැකි දෙයක්ද?


"ඔක්තෝම්බර්වල ගිය Trip එකද? "


"ඔවු අකිල.."


තවත් මොනවානම් අසන්නද? මේනම් මා දැනසිටි සාරන්‍යා වන්නට බැරිය. මට බොරු කෙරූ හේතුව කුමක් උවත් ඒ බොරුව වහන්නට මේ දින කිහිපයට පමණක් ඇය කිවූ බොරු තොගය ටොන් ගණනක්ය. මට සාරන්‍යා ගැන ඇති වූයේ තදබල පිළිකුලකි.


"විමූ.. මට office එකෙන් call එකක් එනවා, මම ඔයාට පස්සෙ ගන්නම්.."

මට තවදුරටත් විමාෂාත් සමග කතා කිරීමේ අපහසුවක් ඇතිවුණි.
 

"හරි අකිල, අප්සෙට් ගන්න එපා.."

"ඒක අප්සෙට් ගන්න දෙයක් නෙවෙයි විමූ, සාරන්‍යා කාවම උනත් Marry කරන්න එපැයි. මම ඔයාට නිවාඩු පාඩුවෙ ගන්නම්.."


මට සාරන්‍යා ගැන ඇතිවූ කලකිරීම කියා නිමකල නොහැකි එකකි. මේ තරම් කාලයක් ඇය කිවූ දේවල් බොරුබව තවමත් ඇදහීමටවත් නොහැක. ඇය කෙතරම් අහිංසකද. ගන්ධබ්බ අවස්ථාවක සිටින කලෙක මෙන් මාව පාවෙමින් තිබුනේ විශ්වාසය පිළිබදව ඇතිවූ කෙලවරක් නොමැති සංව්ගය නිසාය. සාරන්‍යා මේ තරම් හපන්කමක් කලේ කෙසේද? නොදැනීම පැයක් පමණ ගතවී ඇත. කරන්නම දෙයක් නැති තැන සාරන්‍යාට ඇමතුවත් ඇය දුරකථනය විසන්ධි කලාය. නැවත නැවතත් ඇමතුවත් ඇය විසන්ධි කලාය. වෙනදාට ඇය ඇමතුමක් විසන්ධි කරන්නේ දේශනයක සිටින විටදී පමණි. නමුත් අද ඇය නිවසේය. විනාඩි පහකට පසු කෙටි පණිවිඩයක් ලැබුණි.

Akila oya mokakda me ehatai mehatai call kara kara karanne? ayyath dan mata call karala hodatama benna. oyata one mage ayyawa mata nethi karannada? mata mage paduwe inna denna. mata hemadetama wada ayyawa watinawa.


සමාප්තයි !

"සාරන්‍යා" නමින් මෙතෙක් දිනක් දිගහැරුන කතාව අදින් අවසන්වෙයි. සාරන්‍යාලා, අකිලලා, සංජයලා ඔබත් මමත් ජීවත්වන සමාජයේ කෙතෙකුත් ඇත. ඇතැම්විට ඔබට මුණගැසීද ඇත. ඇතැම්විට ඔබ මින් එක් චරිතයක් වන්නටද ඇත. ඉදින් අප සාරන්‍යාලා, අකිලලා මෙන්ම ඔවුන්ගේ චරිත ස්වභාවයන්ද, ඔවුන්ගේ ආශාවන්ද, ඔවුන්ගේ බලාපොරොත්තුද තේරුම්ගෙන ඔවුන්ම සමගින් ජීවත්වමු.

නිරෝෂ් මෛති‍්‍ර
2012/05/19




Friday, May 18, 2012

ඓශ්චර්ය විදිමින්..



හෙට සැමරේවි
තවත් එක් දිනක්
උඹලාව
විකුණන් කන..
ලගින්නට වේවි
ගිණි අවුවෙ,
උන් ඉද්දි
ටෙන්ට් යට...

රටක් රැකි විරුවන්
අද නිදන් හොරුන්
ඔබ පිදු දෑතින්
ගසති අපම
පොල්...

එදා දෙමළාට දිග්වූ
කටපුච්චා..
අද සිහළ බෞද්ධයාට..
ඒ විතරක්ද,
දේශපේ‍්‍රමියාටත්..

එකම මවකගෙ
දරුවන් මරා,
අපි දිනූ කිරුළ
ඇස්පනා පිටය..

- නිරෝෂ් මෛති‍්‍ර -
2012/05/18

Sunday, May 13, 2012

ඔබා මාමේ.... උඹට නිවන් සුව....!!!



අදින් පසු ඔබා මාමාගේ Post නොවැටෙනු ඇත. Comments නොවැටෙනු ඇත. නමුත් සුන්දර මිනිසෙකු ලෙස ඔහු තැබූ සටහන් සදාකල් පවතිනු ඇත. අද සමස්ත බ්ලොග් පාඨකයන් සියලු දෙනාම අඩුම තරමේ ඔහු වෙනුවෙන් සුසුමක් හෝ හෙලති. මන්ද ඒතරම් ඔබා මාමා බ්ලොග් ලියන්නන් අතර ජනපි‍්‍රය චරිතයක් වූ බැවිනි. බ්ලොග් පාඨකයන්ගේ සිනාසෙන රූප අද සුදු කොඩි බවට හැරී ඇත. ඇත්තෙන්ම බ්ලොග් ලියන්නන්ගේ එකමුතුකම ගැනනම් ඉතාමත් සතුටුය.
බ්ලොග් ලියන්නෙක් වෙනුවෙන් මේතරම් එකමුතුවක් මින් පෙර දුටුවේ අවස්ථාවන් දෙකකදී පමණි. එක් අවස්ථාවක් නම් ඉලන්දාරියා අසනීපවී සියලු දෙනාම එක්ව ඔහු වෙනුවෙන් මුදල් එකතු කල අවස්ථාවයි.
අනික නම් ටැබූගේ බ්ලොගය හැක් කර විනාශ කර දැමූ දිනයයි.කෙසේ වෙතත් අප අතරන් හදිසියේ වෙන්වූ සොදුරු මිනිසාට හදවතින්ම නිර්වාන සුවය ප‍්‍රාර්ථනා කරමු.

ඔබ මාමාගේ වියෝව ගැන අන්තර්ජාලයේ පලවී තිබූ කදුළු බින්දු කිහිපයක්...

 -   හඳුනාගත් දින පටන් අප සතුටින් තැබූ පිනෙන්ම
සනත් (ඔබ්සවර්)
අයියේ නුඹට නිවන් සුවයම ලැබේවා..!

 - ආදරණීය සනත් විජේවර්ධන හෙවත් ඔබා මාමේ...ඔබට අජරාමර නිවන් සුව!

- ආයෙත් මගෙ තියා කාගේවත් පෝස්ට් කියවීමට ඔබා මාමා එන්නේ නැත....
                            දයාබර සහෘදය ඔබට නිවන් සුව!!!
අද බුකිය පාළුයි...
ජෝක් නෑ...
ආතල් නෑ...
මඩ නෑ...
කොටින්ම චැට් එකේ කතාබහත් නැවතිලා...
ඇත්තටම ඔබා මාමේ,
ඔයා යන්නම ගිහින් කියලා කොහොම හිතන්නද?
අනේ,
ආයෙත් අද හෙටම අපේ පැත්තෙ ඇවිත් යන්න එන්න...
අළුත් පෝස්ට් එකකුත් ලියාගෙන...
ඔයාගෙ කමෙන්ට් එක වැටෙනකම්
අපේ බ්ලොග් සියගණනක් බලාගෙන ඉන්නවා ඔබා මාමෙ...
ඉතින්,
නිවන් දකින්නට කලින් එකම එක සැරයක්...
අපේ පැත්තෙ ඇවිත් යන්න එන්න...
ජීවිතේ එකම එක වරක් දැකපු..
හැබැහින් වචන කීපයකට වඩා කතා නොකරපු
උඹ සදහටම වෙන්වෙලා කියල ඇහුවාම
මගේ පපුව හිර උනේ ඇයිද කියල මම තාමත් දන්නෙ නෑ...

බ්ලොග් ලෝකෙට අලුත් එකෙක් විදියට
වෙන උන්ගෙ බ්ලොග් කියවගෙන යද්දි
සමහර පෝස්ට් වලට වඩා.. උඹේ කමෙන්ට් කියවන්න මම ආස කරා...

මමත් බ්ලොග් එකක පටන් ගත්තාම
උඹේ කමෙට් එකක් වැටුන දවසෙ
ඒක මට මහා ලොකු කමක් උනා...

ඒ උඹ මගේ හිතේ එච්චර " පොරක් " වෙලා ඉදපු නිසයි...


උඹ පොරක් උනේ වයස් සීමාවෙන් වෙන් කරන්න බැරි වෙච්ච යාලු කමට...
උඹ පොරක් උනේ හිතවත්කමට....
උඹ පොරක් උනේ මනුස්ස කමට....

එදා උඹත් එක්ක හිනා උන හැමෝම
ඇස්වල කදුළු පුරෝගෙන
බලාගෙන ඉදිද්දි...
තව ටිකකින්
උඹ හිනාවෙලාම යන්න යාවි....

උඹ විතරක් හිනා වෙද්දි
අපි ඔක්කොම අඩාවි...
අද ඉදං... බ්ලොග් අවකාශයේ හිනාව අඩුවේවි....

ඔබා මාමේ....
උඹ අපේ හිත් තුල හැමදාටම අමරණීයයි..... 

උඹට නිවන් සුව....!!!



දයාබර පාඨකයිනි,
අප සියල්ලන්ගේම හදවත් කම්පනය කළ ඔබා මාමාගේ හදිසි නික්මයාම හේතුවෙන් "අයියෝ සල්ලි" බ්ලොග් අඩවියෙහි සතියකට පමණ අළුත් පෝස්ට් පළ කිරීමෙන් වැලකී සිටීමට අප තීරණය කර ඇති බව දැනුම්දෙනු කැමැත්තෙමු.

ස්තුතියි...


 


ඔබා මාමාගේ බ්ලොගය http://observer-nireekshaka-observer.blogspot.com


- නිරෝෂ් මෛත‍්‍රි -
   2012/05/14
 

Tuesday, May 8, 2012

බයයි - බදින්න වෙන ගෑණි ගැන


ඉරේෂා call කලාද?
- ඔය ගත්තෙ දැන් ටිකකට කලින්..
 මොකද බං ඕනවට එපාවට වගේ ?
- අනේ බං දැන් කතා කලත් එකයි, නැතත් එකයි..
ඇයි ඒ ?
- ඒකි නොගත්තොත් චතුරි ගන්නවා, දෙන්නම නොගත්තොත් නිකං ඉන්නවා..
උඹ මාර පොරක්නෙ !
- මාර තමයි බං. මොකා එක්ක හිටියත් ඉස්සර වගේ Love Feelings දැන් එන්නෑ බං.
ඇයි ඒ ?
- බොක්කෙන්ම Love කරපු එකී දාලා ගියාට පස්සෙ දකින දකින කොයි වත්තට හරි පැනලා උලා කෑවා මිසක්, සිරා වෙන්න හිතෙන්නෙම නෑ බං.

හ්ම්..
- ඒත් මට බයයි බං..
ඒ මොකෝ ?
- මෙහෙම තිරිසන් වෙලා ආයෙ මොකෙක් ගැනවත් ඇත්තට ආදරයක් නොදැනෙයි කියලා..
ආ.. දැන් ඒකද උඹට තියෙන බය ?
- බය මං ගැන නෙවෙයි මචං..
එහෙනම් ?
- මම හොයාගත්තෙ නැතත් ගෙදරින් හරි හොයලා බන්දලා දෙන ගෑණි ගැන..



- නිරෝෂ් මෛති‍්‍ර -
    2012/05/08 



මම දැන් රැඩිකල් (18 +)



නිමිත්ත : මම තේරුම්ගත්තා බං රැවුල වවලා විප්ලව කරන්න බැහැ කියලා, ඒ හින්දා කැපුවා.

"මාක්ස්  කියා මට කියන්න"
මං හරි ආසයි...
'වෙඩ්ඩා' වගේ කවි ලියන්න
මං හරි ආසයි...
'ෆ්‍රොයිඩ්' වගේ ලෙඩ හොයන්න
මං හරි ආසයි...
"අනේ මාව පොර කරන්න"
මං හරි ආසයි...

මොන විප්ලව කෙරුවත් මම
පිටු පිරෙන්න ලිව්වත් මම
ආසයි මම මටම කියා
පොෂ් කෙල්ලෙක්
ඉන්නවානම්...

හැබැයි ඔයා බැහැ කිව්වොත්
ෆැන්ටසියෙන් ඇද දැම්මොත්
නියම ලෙනින් කවුද කියා
පෙන්නමි මම අම්මාටත්...

බඩුව උඹයි මම *කාපු
පෙට්ටි පොඩ්ඩ මම කඩාපු
හෙළුවැල්ලෙන් ගංවතුරේ
පීන පීන කිති කවාපු...

"ඒකි ඇන්දෙම රෝස පාට"
"ටොයිලට් ගියෙත් මට කියලා"
"ඇනගන්නමයි ආස"
"මම නෑනෙ ඉතිං ඕවට..."

"තේරෙනවා නේද බොලාට"
"දැන් පිප්පුවාට ඔය *ත්ති"
"මම නැතුව ඕකිට
රෑට නින්ද ගියෙත් නෑ..."

අපිත් කරමු විප්ලවේ..
පෙළ ගැහෙන්න යාලුවේ..
එතකොට උඹටත් කියාවි,
"දැන් ඌ රැඩිකල්..."

- නිරෝෂ් මෛති‍්‍ර -
2012/05/08

Sunday, May 6, 2012

සාරන්‍යා 05

මෙතනින් (සාරන්‍යා 01) 
මෙතනින් (සාරන්‍යා 02)  
මෙතනින් (සාරන්‍යා 03)  
මෙතනින් (සාරන්‍යා 04)  

 දිගුවේලාවක් දුරකථනය නාදවීමෙන් අනතුරුව සාරන්‍යා සම්බන්ධ විය.

"ඔවු අකිල.."

"මට පොඩ්ඩක් කතාකරන්න පුළුවන්ද? "

"Sure.."

කොහෙන් පටන්ගෙන මොනවා අහන්නදැයි මටම නොතේරේ.

"සංජය මට Call කලා.."

"ආ.. අයියා ඔයාට ගත්තද? ඒ කියන්නෙ දැන් දෙන්නා යාළුවො.."


සිහින් සිනාවක් සමගින් සාරන්‍යා කීවාය. 'ඔවු  ඕනවටත් වඩා' යැයි කියන්නට සිතුණි.

"සාරන්‍යා මම ගත්තේ ඔයාගෙන් පොඩි දෙයක් අහන්න, ඔයා මට ඇත්තම කියනවානම් මම කැමතියි.."


"ඒ මොකක් ගැනද? "


"ඔයාගෙ Affair එක පටන් ගත්තෙ ඊයෙ ඉදන් නෙවෙයි නේද? "


ක්ෂණික පිළිතුරක් බලාපොරොත්තු වූවත් එය තත්ත්පර දහයකටත් වඩා ප‍්‍රමාද විය.


"ඇයි අකිල එහෙම අහන්නෙ? "


වෙලා අරගෙනද ඇය දුන්නේ උත්තරයක් නොව තවත් ප‍්‍රශ්නයකි.


"ප‍්‍රශ්නෙකට ප‍්‍රශ්නෙකින් උත්තර දෙන්නෙපා සාරන්‍යා, ඇත්තම කතාව ඔයාගෙ Affair එකට දැන් මාස 03ක් වෙනවා, මම හරි නේද? ඇත්ත කිව්වනම් ඔයාට පවු පිරෙනවද? "


"ඇයි අකිල මේ කලබල වෙලා,ඔයාට පිස්සුද, මොනාද මේ කියවන්නෙ.."

තවමත් මට ලැබෙන්නේ උත්තර නොව ප‍්‍රශ්නය.


"මේකයි සාරන්‍යා.. මට ඒක කවදා පටන්ගත්තත් කමක් නැහැ, ඒත් මට දැනගන්න  ඕනෙ මෙච්චරයි, ඔයාට මට බොරු කියන්න තිබ්බ උවමනාව මොකක්ද? "


සාරන්‍යා අද පිළිතුරු දීමට වැඩි කාලයක් ගැනීම මට මහත් කුතුහලයකි.

"දැන් කවුද ඔයාට ඔය බොරුව කිව්වෙ? "


"කිව්වෙ ඔයාගෙ අයියා .."


සාරන්‍යා නැවතත් නිහඩය.


"මේ මොන විකාර කතාවක්ද? ඉන්න මම එයාගෙන් අහන්නම්. අනික ඔයාට මට වඩා දැකලාවත් නැති කෙනෙක් ලොකු උනාද? "


ඇයව තවමත් මට උවමනාටවත් වඩා විශ්වාසය. සාරන්‍යා අසනීප වූ දින සිට මා ඇයගේ සතුට වෙනුවෙන් නොකල දෙයක් නැත.ඇය කැමති කෙනෙකු සමගින් නැවත සම්බන්ධයක් ඇතිකරගැනීමට ඉඩදී මා හිත හදාගත්තේද ඇයගේ සතුට වෙනුවෙනි.


"ඔයාලා කැමති දෙයක් කතාබහ කරගන්න. මට ඕනඋනේ හැමදේටම ඉඩදීපු මට ඔයා බොරුකිව්වද කියලා දැනගන්න විතරයි.."


"මම ඔයාට බොරු කරනවද අකිල.."


"හ්ම්.. මට ඔයාව විශ්වාසයි.."


"ඒකනෙ.. පිස්සු විකාර හිතන්න එපා, උදේට කාලද ඉන්නෙ?

"තව නැහැ සාරන්‍යා.."

"හරි එහෙනම් දැන් ගිහින් කන්න, මම අයියාට Call කරලා දවල්වෙලා ඔයාට ගන්නම් හොදද..
ආ... කියනකොටම එයා මට ගන්නවා. මම එහෙනම් තියන්නම් අකිල,අනං මනං හිතන්න යන්නෙපා.
බුදු සරණයි..."


"බුදු සරණයි.."


සංජය මට බොරු කියන්නට ඇතැයි කියා සිත හදාගන්නද? සාරන්‍යා මට අවිශ්වාස කිරීමට තරම් දෙයක් මේවන තුරුත් ඇය මට කර නැත. නමුත් මගේ සිතට නැගෙන්නේ විස්තර කිරීමට නොහැකි ගුප්ත ස්වභාවයකි. සාරන්‍යාට මෙන්ම සංජයටද මාහට බොරුකිරීමට ඇති අවශ්‍යතාවය කුමක්ද? මට නැවත මතක්වූයේ සංජයගේ අංකයයි.දුරකථනය අතට ගෙන Received call List එකේ සංජයගේ අංකය නැවත බැලූවෙමි. මට හීන් දාඩිය දැම්මේ එවෙලෙහිය. සාරන්‍යාගේ අංකයෙන් අවසන් අංක දෙකෙන් පමනක් වෙනස් වන ඔහුගේ අංකය නිසැකයෙන්ම කපල් පැකේජ් එකක් වන්නට ඇත. සාරන්‍යා නව අංකය භාවිතා කරන්නට ගත්තේද මීට මාස දෙකකට පමණ පෙර සිටය.එසේනම් සාරන්‍යා මට මේ කියන්නේ ගල් පැලෙන බොරුද?

(මතු සම්බන්ධයි)
මීළඟට...සාරන්‍යා අවසාන කොටස 

- නිරෝෂ් මෛති‍්‍ර -
2012/05/06


මෙතනින් සාරන්‍යා 06 - අවසාන කොටස  


Thursday, May 3, 2012

බෲටස් නම් ඔහු (18 +)


හිස්ටීරියාකාරයෙකු,
මාක්ස්වාදියෙකු,
විප්ලවවාදියෙකු,
ශ්‍රේෂ්ඨ චින්තකයෙකු,
ලෙස

ඔබ මා දකිනවානම්
මා සතුටුය..
මේ ගොන් හරක්
මට දෙන ගරු නම්බු දැක,
මගේ අග්නාශය 

නලියයි..
පුරහ්ස්ථි ග්‍රන්ථියයෙන්
ස‍්‍රාවයක් 

වෑහෙන්ට ගනියි..
අවසානයේ මා 

පුදුමාකාර 
සංප්‍රමෝදයකින්,
සුරාන්තයේ අවසන් 

මුදුනට පැමිනෙයි..
ආහ්...
දැන් මට අනුව මා පොරකි,
copy නොකරන,

අලූත් දේ කරන,
මා පොරකි..

කෙතරම් පොරක් වීද යත්,
මිතුරු වේශය නම්,
ඊනියා ඔළුබක්කා දමාගෙන
මා ඔබට අනින්නේ
පපුවට නොව
පිටටය..


"Sorry මචං, මට හුරු එහෙම 
අනින්න විතරයි.ගනන් ගන්න එපා"
හහ්.. හහ්.. හා...

- නිරෝෂ් මෛති‍්‍ර -
2012/05/04

 

Tuesday, May 1, 2012

සාරන්‍යා 04



මෙතනින් (සාරන්‍යා 01)  
මෙතනින් (සාරන්‍යා 02)  
මෙතනින් (සාරන්‍යා 03)  

අදනම් පුදුමාකාර දිනයකි. ඇහැරුන වෙලේ ඉදන් ඇහෙන්නේ හතරබීරි කතාය. සංජය නම් නිගන්ඨයා මේ ඇද බාන්නේ ගල් පැලෙන බොරුවක්ද? මාස 03ක් වන පේ‍්‍රම සම්බන්ධතාවයක් සාරන්‍යා මගෙන් වසන් කරන්නේ අහවල් එකකටද? එසේ කිරීමට ඇයට ඇති උවමනාව කුමක්ද? අනෙක කිසි දිනෙක දැක නැති පුද්ගලයෙකුගේ ඇමතුමකට මා කලබලවන්නේ ඇයි...

"මම හිතන්නේ සංජය හොදට විහිළු කරන්නත් දන්නවා..."


"මොන විහිළුවක්ද, මේවා විහිළුවට ගන්න ඕන දේවල් නෙවෙයිනෙ අකිල,
කවුද ඔයාට කිව්වෙ ඊයෙ සාරන්‍යා මට කැමතියි කිව්වා කියලා? සාරන්‍යාද ? "


"නැතුව ඉතිං කැම්පස් එකේ VC මට කතා කරන්නෙ නැහැනෙ සංජය.."


"සාරන්‍යා ඇයි එහෙම බොරුවක් ඔයාට කිව්වෙ.. සාරන්‍යා මට කැමතියි කිව්වෙ අපි Batch Trip එක ගියපු දවසෙ, ඒ මීට මාස තුනකට කලින්. ඒක මුලු Batch එකම දන්නවා.."


"සංජය ඔයා ඔය ඇත්තමද කියන්නෙ? 

බැරිම තැන මම ඇහුවෙමි.


"මම ඔයාට බොරු කියලා කඩන්නවත් ඔයාලගෙ දැන් affair එකක් නැහැනෙ අකිල, සාරන්‍යා කොහොමටත් මගේ, එහෙම එකේ ඇයි මම ඔයාට බොරු කිය කියා කාලෙ නාස්ති කර ගන්නෙ? එයා මට හරිම ආදරෙයි.."


මටනම් මෙහි අගක් මුලක් නොතේරේ.

"කැම්පස් එකේ කැන්ටිමේ කෑම කටේ තියන්න බැහැ. දවසක් මම ඕක සාරන්‍යාට කිව්වා. පහුවෙනිදා ඉදන් එයා හොස්ටල් එකේ උයලා මටත් කෑම එකක් දෙනවා. ඊයෙ ජිම් එකේදි පොඩි තැලීමක් උනා. හවසම එයා ඇවිත් ඇස්වල කදුළු පුරවන් බාම් ගාලයි ගියේ.. එහෙම එකේ මම ඔයාට බොරු කියලා මොනා කරන්නද? අනෙක ඉතිං ඔයාටම මේක අහන්නත් පුළුවන්නෙ.එයා ඔයාට කතා කරනවනෙ"

පොලු පාරක් වැදුන කලෙක මෙන් මම තෝන්තුවී ගියේය. බත් උයාගෙන කන්න බැරිනම් කෝම්පිට්ටු හදන් කෑවත් මට කමක් නැත,මන්ද මම නැති උවද සාරන්‍යාටද ජීවිතයක් තිබුය යුතු නිසාවෙනි. නමුත් සාරන්‍යාට මට බොරු නොකර ඉන්නට තිබුනි. මේවන තුරුත් කවදාවත් ඇය මට බොරුකියානම් නැත. සංජය කියනවාක් මෙන් ඔහුටද මට බොරුකීමේ අවශ්‍යාතාවයක් නැත. කවදා පටන්ගත්තද දැන් ඔවුන් පෙම්වතුන්ය. මෙතන ඇත්තේ මට 'අයියේ' කියලා කතා කරන්නද සූදානම් වූ සාරන්‍යාගේ බොරු කලේ ඇයිද යන උබතෝකෝටික ප‍්‍රශ්නයයි.

"මම හිතන්නෑ සංජය සාරන්‍යා ඒ තරම් බොරුවක් මට කියයි කියලා, ඔයා ෆෝන් එක තියන්න. මම එයාට ගන්නම්"


මට තවමත් සාරන්‍යා විශ්වාසය.


"ඔයා ඇහුවත් නැතත් මම එයාගෙන් අහනවා, මොකද මටත් ලැජ්ජයිනෙ මේ කතාව ඇත්තනම්. මම තියනවා අකිල.."


"ok bye..."

මම තත්පරයක්වත් නාස්ති නොකර සාරන්‍යාට ඇමතුවෙමි. පාන්දරම ඔළුව විකාරවී උතුර දකුණ මාරුවී ඇත.අද ඇයගේ දුරකථනයේ Ringing Tone එකකුත් වාදනය වෙයි .

'Tujh mein rab dikhta hai
Yaara mein kya karu..'



"Rab Ne Banadi Jodi.......... "

(මතු සම්බන්ධයි) 


- නිරෝෂ් මෛති‍්‍ර -
2012/05/02


මෙතනින් (සාරන්‍යා 05)  
මෙතනින් (සාරන්‍යා 06)  


Sunday, April 29, 2012

සාරන්‍යා 03



මෙතනින් (සාරන්‍යා 01)
මෙතනින් (සාරන්‍යා 02)

නිවාඩු දින ගත කිරීමට සිටි සැහැල්ලුව සතුට උදෑසනින්ම සාරන්‍යා විසින් උඩුහුලගේ පා කළාය. ඒ මදිවට දැන් අයියලා එක්කත් යාළු මිත‍්‍රකම් පැවැත්වීමට සිදුවී ඇත. වෙන දෙයක් වෙන්න කියා මම දුරකථනය අතට ගත්තෙමි.

"හෙලෝ.."


"මේ අකිලද? "


මගේ දුරකථනයට
නම් ඇමතුවේ "මම අකිල නැතුව තොගෙ ***ද" අහන්න සිතුනත් ආයාසයෙන් එය මැඩගත්තේ අනෙක් පසෙන් ආවේ නොදන්නා හඩක් නිසාවෙනි.

"ඔවු අකිල තමයි.. මේ කවුද? "


"මම සංජය.. සාරන්‍යා නංගි කියන්න ඇති නේද මං ගැන "


මේ සාරන්‍යාගේ පෙම්වතා වන්නට ඇත. දැන් මම මොනවා කතාකරන්නද?


"ආ ඔවු සංජය.. මට කියලා තියෙනවා ඔයා ගැන.. ඉතින් කොහොමද? "


"වරදක් නැහැ අද වැඩද? "


"නැහැ සංජය.. අද off එක"


සංවාදයක් පවත්වාගෙන යාමේ පිරියක් මට නැත. එබැවින් කටට එන්නේම කෙටි පිළිතුරුය.


"සංජයට මට කතා කරන්න ඕනෙ කිව්වෙ විශේෂ දේකටද? "


"නැහැ එහෙම විශේෂ දෙයක් නැහැ.. මට සාරන්‍යා ඔය දෙන්නාගෙ සම්බන්ධෙ ගැන කියලා තියෙනවා."

'ඉතිං' කියලා අහන්න සිතුණි. සංජය කතා කරන විලාශයට මට හිනා යන්නටම එයි. දකුණු පළාතේ උග‍්‍ර ග‍්‍රාමීය ප‍්‍රදේශයක හැදුන කෙනෙක්වත් මෙතරම් ඇද ඇද කතාකරන්නේ නැත.


"සංජය කොහෙද? "


"මම මාතර.."


අයියෝ සල්ලි. මම හිතුවා හරියටම හරිය..


"ඔයාලගේ සම්බන්ධෙ කොච්චරකල් තිබුනද? "


"අවුරුදු දෙකක් විතර සංජය.."


"ලොකු කාලයක් නේද? "


"හ්ම්.."


"එතකොට ඔයාලා අතර තිබුනේ මොනවගේ සම්බන්ධයක්ද? "


අනේ මගේ කටට එන දේවල් ඇයි දෙයියනේ නිදහසේ කියන්න ඉඩක් නැත්තේ.. අඩුතරමේ නිදහසේ සිනාසෙන්නවත්.. සාරන්‍යාත් මාත් අතර තිබුනේ මාපිය දූදරු සම්බන්ධයක් කියා කියමුද?


"මට තේරුන්නෑ සංජය ඔයා අහනදේ ගැන.."


"නෑ මම කියන්නෙ මේකයි.. මටත් මීට කලින් සම්බන්ධයක් තිබුණා. අපි දන්නවනෙ ඉතිං, ඒවගේ දෙකදි මොනවා මොනවද වෙන්නෙ කියලා.. ඔයත් කොල්ලෙක් මාත් කොල්ලෙක්නෙ, ඒ ගැනයි මම ඇහුවෙ.."

මූ නම් මාරම පොරකි. යකඩෝ දැකලාවත් නැති මගෙන් අහන ප‍්‍රශ්න. අනික මේකට මෙච්චර හයියක්..


"මේකයි සංජය, ඔයා අහන්නෙ තේරුමක් නැති ප‍්‍රශ්නයක්. අපේ affair එක ඇතුලෙ මොනවා උනත්, ඒක දැන් අදාල නැහැනෙ. සාරන්‍යා දැන් ඉන්නෙ ඔයත් එක්ක. ඔයාට එයා හොද නිසා වෙන්න ඇතිනෙ ඔයා එයත් එක්ක affair එකක් පටන් ගත්තෙ.. ඊයෙ ඔයා මෙච්චර දවස් සාරන්‍යාගෙන් අහපුදේට උත්තර ලැබුනනෙ. ඒනිසා දැන් ඔය දෙන්නා හොදින් ඉන්න. පරණ කුණු අදින්නෙ නැතුව. ඔයවගේ නැති ප‍්‍රශ්න අදින එක ඔයාට ඇති වැඩකුත් නැහැ, මටත් ඇති වැඩක් නැහැ.."


තරමක ආවේගයෙන් නමුත් පැහැදිලි හඩින් මම එක දිගට කීවෙමි.


"තරහ ගන්න එපා අකිල.. මම නිකමට ඇහුවෙ, අනික ඔයා මොකක්ද මේ කිව්වෙ ඊයේ උත්තර ලැබුන කතාවක්? "


"මම මොකක්ද කිව්වෙ කියන්නෙ? සාරන්‍යා ඊයෙනෙ ඔයාගෙ යෝජනාවට කැමති උනේ, ඒ ගැනයි මම කිව්වෙ.. "


"අකිලට පිස්සුද?  සාරන්‍යාගෙයි මගෙයි සම්බන්ධෙට අනිද්දට මාස තුනක්..."


(මතු සම්බන්ධයි)  

- නිරෝෂ් මෛති‍්‍ර -
2012/04/29
  

මෙතනින් (සාරන්‍යා 04) 
මෙතනින් (සාරන්‍යා 05)  
මෙතනින් (සාරන්‍යා 06) - අවසාන කොටස


Friday, April 27, 2012

සාරන්‍යා 02



 මෙතනින් (සාරන්‍යා 01) 

එදින නිවාඩු දිනයක් වූ බැවින් ටිකක් වැඩිපුර නිදගන්නට ලැබුණි. අද කරන්නට විශේෂ යමක් නොතිබූ බැවින් තවත් ටික වෙලාවක් ඇදේ දිග පලල මැන්නේය. ජංගම දුරකථනය බෙරිහන් දෙන්නට වූයෙන් මිනුම් කටයුතු නිමාකරන්නට සිදුවිය.ඉස්සර දුරකථනය නාදවීම තරම් පි‍්‍රයජනක සංගීතයක් තුන්ලෝකයේම නැතත් දැන්නම් එය දස වදයකි. නිදිමතේම අතපතගා දුරකථනය ගෙන බලන විට ඇමතුම සාරන්‍යාගෙනි. එක්වරම හිත අතීතයට දිව ගියේය.

"ගුඩ් මෝර්නින් මහත්තයෝ.."

"මෝර්නින්.. මෝර්නින්.. ඇයි දෙයියනේ මහ පාන්දර,
ඔයාට නින්ද යනවා හොරයිද? "
 

"හොද පාන්දර, නැගිටිනවා කම්මැලියා..
දැන් වෙලාව අටයි, කීයටද ක්ලාස් යන්නෙ..
 

"අනේ මට බැරියෝ... මම තියනෝ......"

වෙනදාට ඇහැරෙන්නේ ඇගේ ඇමතුමෙනි. නින්දට යන්නේද ඇගේ ඇමතුමෙනි. දැන් ඒ මල්සමය නිමවී බොහෝ කල්ය.

"ගුඩ් මෝර්නින්"
 

වෙනසකට ඇත්තේ දැන් අමුවෙන්ම ගුඩ් මෝර්නින්ය.ඉන්පසුව විශේෂණ පදත් සමග කියැවෙන මගේ නම නැත.
කෙසේ උවද ඇගේ හඩ වෙනදාටත් වඩා ප‍්‍රබෝධමත්ය.

"ගුඩ් මෝර්නින්.. ඇයි මේ ගොඩ කාලෙකින් උදේම call කලේ? "


"ඔයා නිදාගෙනද හිටියේ? Sorry අකිල.. මම පොඩි පණිවිඩයක් කියන්න ගත්තෙ.."


"නෑ ඒකට කමක් නැහැ, ඔයා කියන්න.."


පණිවිඩය පොඩි එකක් වන්නට බැරිය.


"අකිල ඊයෙ මම අරක ගැන තීරණයක් ගත්තා. පස්සෙ අයියාට මම ඒ ගැන කිව්වා"

"මොකක් ගැනද? "


"එයා අහපු දේ ගැන,මම ඒකට කැමතියි කියලා"


මෙය නම් සොදුරු උදෑසනකි.ඉබේම ඇදේ ඉන්දවුනි. දැන් මම මොන ආකාරයේ පිළිතුරක් දෙන්නද?


"අකිල.."


"ඔවු කියන්න"


"ඔයා අහගෙනද ඉන්නෙ.."


"හ්ම්..."


"ඔයා දුකෙන්ද? "


ඇයට මගේ වෙනස තේරෙන්නට ඇත.ඇය වසර දෙකක් කුළුදුලේම ඇසුරුකල පිරිමියා මමය.


"නැහැ සාරන්‍යා.. තාම නිදිමතේනෙ, ඒකයි. ඔයා හිතලා බලලානම් තීරණය ගත්තෙ, මම wish කරනවා ඔයාට.. හොදින් ඉන්න.."


"මම අයියට ඔයා ගැනත් කිව්වා. එයා කිව්වා ඔයත් එක්ක කතා කරන්න  ඕනෙ කියලා.."


මේ මොන හෙණ ගෙඩියක් පහත් වෙන්න එනවාද? ප‍්‍රශ්න ගොඩක වැටී කොහොල්ලැ බබා බදාගත්තාක් මෙන් ඉන්න මට නැති ප‍්‍රශ්නය.

"ඒ මොකද.. ඒ මාත් එක්ක මොනවා කතාකරන්නද? "


"විශේෂ දෙයක් නෙවෙයි, යාළුවෙක් වගේ කතා කරන්න. මම කැමතියි ඔය දෙන්නා යාළුවො වෙනවානම්"


මගේ කටට ආවෙ කුණුහරුපය.සිල්ගත්ත නයාගේ කතාව සිහියට ආවේ නිරායාසයෙනි. ඒත් ඇයගේ සිත රිදවීමට නොහැකිය.අනික ඒකත් එක්ක කතා කලා කියලා මම මැරෙනවායැ.


"අයියා දවල්වෙලා ඔයාට ගනියි, කතා කරන්න හොදේ..."


මම නිරුත්තරය.සාරන්‍යාට කැමැත්තකට ඉඩදුන් මට ඇගේ අළුත් පෙම්වතා සමග කතාබස්කර මිතුරුවන්නට කියන්නේ ඇයි? අවංකවම ඇයට ඇත්තේ ඒ උවමනාවද? නැත්නම් මා රිදවීමටද? අප වෙන්වූයේ අපට අප නොගැලපෙන බව තේරුම්ගත් නිසාවෙනි.සාරන්‍යාත් මාත් ඒ දිනවල අසීමිතව රණ්ඩු උනෙමු. හේතු ඇතුව රණ්ඩුවූ අප පසුකාලීනව අහේතුකව රණ්ඩුවන සිල්ලර තත්ත්වයට ඇද වැටුණි.නමුත් කිසිදිනෙක සාරන්‍යා මා හැර නොයන බවට මා තුළ දැඩි විශ්වාසයක් විය.ඒ විශ්වාසය නිසාම බියෙන් සැකෙන් තොරව මා ඇය සමග සිත්සේ රණ්ඩුවිය.මට අවශ්‍යවූයේ මා කැමති දේ පමණක් සාරන්‍යා කරනු දැකීමයි.එය කෙතරම් අසාධාරණ හැසිරීමක්දැයි මා තේරුම් ගන්නා විට සාරන්‍යා මට සැතපුම් සිය ගණනක් දුරින්ය.කෙතරම් රණ්ඩු සරුවල් උවත් සාරන්‍යා හට මා අසීමිතව ආදරය කලේය.ඒ ආදරය ආත්මාර්ථකාමීවූ තැන බහින්බස්වීම් ඇතිවූයේ මගේම පවකට විය යුතුය.


පැයකට පමණ පසු නැවතත් නොදන්නා අංකයකින් ඇමතුමකි.එම අංකය සාරන්‍යාගේ අංකයට බොහොදුරට සමානය.වෙනස ඇත්තේ අවසන් අංක දෙක පමණි.


(මතු සම්බන්ධයි)

- නිරෝෂ් මෛති‍්‍ර -
2012/04/27 


මෙතනින් (සාරන්‍යා 03)
මෙතනින් (සාරන්‍යා 04) 
මෙතනින් (සාරන්‍යා 05)  
මෙතනින් (සාරන්‍යා 06) - අවසාන කොටස  


Wednesday, April 25, 2012

තත්සරණි



දරයත්
සහෝදරත්වයත්
අතර
අපැහැදිලි සෙනෙහස...
විටෙක නැගෙමින්
විටෙක බිදෙමින්
නැගෙන
රළපෙළ...
මිටින් මුදා හළද
හැරදමා නොගිය
සෙනෙහස...
නිබද බෝ
ස්නේහයෙන්
ඡායාව මෙන් රැදුන
ගැහැණිය...
උස් මුදුනක
මා වැජඹෙන්නට
සිහින දුටු
හදවත...
නමක් නැති
නෑකමට
නම් සොයා
ළතනොවෙමු
ඔබ මිහිර
පද වැලක්ය
....................

- නිරෝෂ් මෛත‍්‍රි -
2012/04/26



සාරන්‍යා 01




ඉඩ ලද සෑම විටකම කාර්යාලයේ දිග ජනේලයෙන් මුහුණ ඔබා සුවිශාල ගොඩනැගිලි අතරින් පෙනෙන අහස දෙස ඔහේ බලාගෙන සිටීමට මා පුරුදුවූයේ නිරායාසයෙනි.
ඒ අහස වැඩිපුරම ලස්සනට පේන්නේ ඉර බහින හැන්දෑවටය. විඩාබර දෙනෙතට ඒ අළු අහසනම් රසදුනකි. වැසි දිනකදී එම ජනේලයෙන් පිටත බලා සිටීම තරම් සොදුරු දසුනක් තවත් නැත. තව තට්ටු දෙකක්වත් ඉහලින් කාර්යාලය පිහිටා තිබුනේනම් මුළු කොළඹම මෙතනට දිස්වන්නට ඉඩ තිබුණි.දැහැන බිදුනේ ජංගම දුරකථනය සාක්කුව තුල දෙදරුම් කෑමෙනි. ඇමතුම සාරන්‍යාගෙන්. දිග සුසුමක් හෙලා දුරකථනයට පිළිතුරු දුන්නෙමි.

"කියන්න සාරන්‍යා.."

"ඔයා වැඩකද?"

"නෑ.. වැඩ ඉවරයි. ටිකක් රෑ
උන නිසා ගෙදර යනවද නැද්ද කියලා මම මේ කල්පනා කර කර හිටියෙ.."

"ඇයි මේ වෙලාවට බස් නැද්ද?"

"බස්නම් තියෙනවා. ඒත් ගම්පහ ඉදන් ගෙදරට යන්න බෑනෙ. නවයෙන් පස්සෙ හන්දියෙ තී‍්‍රවීල්වත් නැහැ, ඔයා කොහෙද ඉන්නෙ හොස්ටල් එකේද?"

"හ්ම්..."

"ඇයි හ්ම්? "

සාරන්‍යාගේ හඩ වෙනදාට වඩා අමුතුය. ජනේලයෙන් පිටතින් එන සීතළ සුළඟත් එන්න එන්නම වැඩිය.

"මම ඔයාට දෙයක් කියන්න ගත්තෙ.."

"කියන්න සාරන්‍යා"

"මම අර කිව්වෙ කැම්පස් එකේ අයියා කෙනෙක් ගැන..."

"ඉතිං..."

"මම අද ගෙදර ඉදන් එනකොට, පේරාදෙණිය ස්ටේෂන් එකේදී ඒ අයියාව හම්බුනා..."

"එහෙනම් අදත් ඔයාගෙන් ඇහුවා... මම හරිද?"

"හ්ම්...."

ජනේලය ගාව තවත් ඉන්නට බැරිය. උදුවප් සීතල දැන් ඉදන්ම පටන් ගෙන ඇත. සීතල හිටි ගමන් වැඩිවූයේ ජනේලය විවෘතව තිබෙන නිසාද, නැත්නම් සාරන්‍යා කියූ දෙය නිසාදැයි හිතාගැනීමට නොහැක.මම ජනේලය වසාදමා පුටුවකට බර උනෙමි.

"ඉතිං ඔයා මොකද කිව්වෙ..."

"මම මුකුත් කිව්වෙ නැහැ... මම මොකද කරන්නෙ"

සාරන්‍යා මීට වසර දෙකකට පෙර මගෙ පෙම්වතියයි. වසර දෙකක පේ‍්‍රමය මීට මාස තුනකට පෙර නිමාවූවත්, ඇයත් මමත් ඉඩලද සෑම විටෙකම කතාබහ කලේය. මුලදී ඇයටත් වඩා මා ඇය ඇමතුව වාර ගණන වැඩිවන්නට ඇත. මන්ද එකවරම ඇයගෙන් ඈත්වීමට මට අපහසුවූ බැවිනි.පසුව ඇයට මිතුරෙක් පමණක්වීමට මම හිත හදාගත්තමි.

"මේකයි සාරන්‍යා.. ඔයාට හොදක් වෙනවනම් මගේනම් ඕකට ඇකමැත්තක් නැහැ. හැබැයි හොදට හොයලා බලලා, හොදට හිතලා බලලා කරන දෙයක් කරන්න. නැත්තම් වෙන්නෙ ආයෙමත් දුක්විදින්න.."

මා එය කීවේ හිතේ දැඩි සංවේගයක්ද කැටිකරගෙනය. මන්ද අද තත්ත්වය කෙසේ උවද
පෙරදිනයක ඇය මාගේ පෙම්වතියයි.

"ඔයා හරි හොදයි අකිල.. ඉස්සර ප‍්‍රශ්නයක් උනාම කොහොමද ඔයා හැසිරුනේ.. මටනම් පුදුමයිත් එක්ක..."

මම මේසය උඩට කකුල් දෙක ගත්තමි. දුම්වැටියක අවශ්‍යතාවය තදින් දැනේ.
ඇය මේ කියන්නේ පෙර මම  ඕන එකට මෙන්ම එපා එකටද රණ්ඩුවූ හැටි මතක්වී විය යුතුය.

"දැන් පරණ දේවල් කතාකරලා වැඩක් නැහැනෙ.. වෙන්න තියෙන දෙයක් බලමු. ඔයාට හොදක් වෙනවානම් එච්චරයි.."

ඇය ඉන්නේ සතුටින්ද දුකෙන්දැයි හරිහමන් නිගමනයක් මට නැත. නමුත් ඇය පෙරට වඩා සැනසීමෙන් ඇති බවනම් මට විශ්වාසය.කෙසේ උවත් ඇයව සතුටින් තියන්නට මම ඉටාගත්තේ අප වෙන්වූ පසුවය.

"මම ඔයාට අකිල අයියෙ කියන්නද? "

"ඔයාට මාව ඔයාගෙ අයියා කෙනෙක් වගේ දැනෙනවද? "

"ඇත්තටම ඔවු අකිල.. අපි හැමදාමත් මේ විදියට ඉමු."

හිත තුළ ඇත්තේ හිස් හැඟීමකි. අමුතු සතුටක් මෙන්ම අමුතු දුකක්ද නැත.මේසය උඩ ඇති පැන්සලයකින් පැරණි ෆැක්ස් කොලේක බලි ඇන්දෙමි.

"හිතලා බලලා හොදම තීරණේ ගන්න. මාව අයියා කෙනෙක් විදියට දැනෙනවානම් කරන දෙයක් කියලා කරන්න. මොකද ඔයා අයෙමත් දුකින් ඉන්නවා බලන්න මම ආස නැහැ. මම කැමතියි ඔයා හොද කෙනෙක්ගෙ වෙනවානම්.. ඔයාගෙ දේවල්වලට කරදරයක් වෙන්නෙනම් නැහැ, පුළුවන් හැමදේටම උදව් කරන්නම්, ඔයා සතුටින් ඉන්නවානම්..."

වෙලාවකට බොළද වැඩිවූවාදැයි සිතුනත් ඇත්තෙන්ම මට ඇය කෙරෙහි වූවෙ එවන් හැඟීමක් පමණි. අපගේ පේ‍්‍රමය අවසන් වන දින තෙක්ම මට ඇයට හොදින් සලකන්නට, කතාකරන්නට නොහැකිවිය. ඇය බලාපොරොත්තුවූ උත්තරීතර ආදරය ඇය වෙනුවෙන් විකසිත කරන්නට මට නොහැකි විය. නමුත් එම පේ‍්‍රමයට කණකොකා හැඩූ දින පටන් මට ඇගේ දුරස්වීම දරාගත නොහැකිවිය. ජනේලයෙන් දුර ඈත අහස බලාසිටීමටත් මා හුරුවීමට එක හේතුවක් එයද වන්නට ඇත.ලෝකයේ සිදුවන්නනේ සිදුවන්නට තිබෙන හොදම දෙයනම්, සාරන්‍යා මා හැරයාමෙත් ඇයට අළුතින් පෙම්වතෙකු හමුවීමෙත් ගුණ පමණක් දකින්ට මම ඉටා ගත්තෙමි.


(මතු සම්බන්ධයි)


- නිරෝෂ් මෛති‍්‍ර -
2012/04/25


මෙතනින් (සාරන්‍යා 02)  
මෙතනින් (සාරන්‍යා 03)  
මෙතනින් (සාරන්‍යා 04)  
මෙතනින් (සාරන්‍යා 05)  
මෙතනින් (සාරන්‍යා 06) - අවසාන කොටස  





Tuesday, April 24, 2012

පොද වැස්ස



පාළු අහස යට
අදුරු සැදෑවක
ඔබේ දෙනෙත්
මතකෙට නැගුනා...
සීතල සුළඟත්
වැහිබර අහසත්
ඔබදුටු මුල්දින
මතක් කලා...

එම අහසෙම අද
දුක්බර විලසින්
අදුරු වෙලා
ඔබෙ රුව ඇදුනා...
ඉදහිට වැටෙනා
මේ පොද වැස්සට
ඔබ මෙන් මා වත්
මග හැරුනා...


- නිරෝෂ් මෛත‍්‍රි -
2012/04/24


Monday, April 23, 2012

සමකාලීනයන් අතර වීරයෙක්



එය සුවිශාල Spathodea ගොඩනැගිල්ලට පිටුපසින් මළහිරු බසිමින් තිබූ හැන්දෑවකි.
අපගේ ගුරුවරයෙකුට පෙරකල උපකාරයකට ප‍්‍රතිඋපකාර කරනු වස් පයිප්ප පාරේ අවන්හලක මධුවිත තොළගෑමේ set වීමකට මටද ආරාධනා ලැබුණි.
පැරණි මිතුරන් හමුවීමේ හා ඔවුන් සමග ආගිය තොරතුරු දොඩමළුවීමේ ප‍්‍රහර්ෂයද හිතින් දරාගෙන මා තවත් මිතුරෙකුද සමග අදාල ස්ථානයට යන විටත් සාදය ආරම්භවී තිබුණි.
අප කල උපකාරයන්ට බඩ කට පිරෙනතුරු ස්තූති කතාවලින් පිදුම් ලැබූ පසු,
පවත්නා තත්ත්වය තුළ ලාංකීය දේශපාලනයේ ඉදිරි ගමන
ත්, නැගිටිමින් තිබෙන ජන අරගල ව්‍යාපාරය පිළබදවත්, සම්භාව්‍ය චිත‍්‍රපට කිහිපයක විචාරයන් දෙක තුනකුත්, ඒවනවිට විවාහවීමට නියමිතව සිටි (දැනට විවාහවී සිටින) සගයෙකුට "සාර්ථක විවාහ දිවියකට අපෙන් අත්වැලක්" යන මාතෘකාව යටතේ උපදෙස් මාලාවකුත් යනාදී දේශන, උපදෙස්මාලා, උපකාරක පන්ති, සම්මන්ත‍්‍රණ කිහිපයක්ද මේ සුළු කාලය අතර අපේ සෙට්එක නොමිලේම ලබාදුන්නේය.ඒවාට අපේ උන් උපන් හපනුන්ය. ඇතැම් අය උපදෙස් සදහාම සමස්ත ලංකා මට්ටමේ සහතිකපත් ලාභීන්ය.බෝතලය මේසය වටා වරක් දෙවරක් පැදකුණු කල පසු දැන් යන්නේ ක්ෂිතිජයට ආසන්නයේ කතාබස්ය.හිස්ටීරියාව, මනෝ විශ්ලේශනය, සංජනනය, දීප්ති කියන්නේ කවුද? ලෝකෙ නැති ප‍්‍රශ්නය.
බෝතලය, බයිට් ප්ලේට් එක, බෝතල් දෙක, බයිට් ප්ලේට් දෙක, තුන, හතර හිස් වෙමින් තිබුණි.වටින් පිටින් එළිවෙමින් තිබෙන නිසාදෝ හොද හොද සෙල්ලම් කරළියට එමින් තිබුණි.දැන් උස්මිටිකම් නොමැති සමතලා සමාජයකි. කලින් අයියලා දැන් මචංලාය. කලින් මචංලා දැන් හු** ලාය.

" ඕකාට ඔය මුකුත් කියලා වැඩක් නැහැ.. ඌ විඥාණවාදියෙක්.. ඌ දෙයක් තේරුම් අරන් ඉන්නෙ මෙහෙමයි.. ඒ නිසා ඌ ඒ මතේ අත්අරින්න ලෑස්ති නැහැ. කවදාවත් විඥාණවාදීන්ට පැහැදිලිකිරීම් කරන්න බැහැ.. මොකද ඌ මතයක පිහිටලා, දැනටමත් උගේම කියලා ෆැන්ටසියක් ගොඩනගාගෙන ඉවර නිසා.."


"ආ....."

රසකතා ගොඩකි. ඉහත පැහැදිලි කිරීම ඔහුටම අකුරු කරවූ ගුරුවරයෙකුටය. මට ඉබේටම බයිට් කැවේ.

"හරි.. දැන් මොකක්ද උඹ ඔය කියන විඥාණවාදය? " ඉහත කී ගුරුවරයාගෙන් හරස් ප‍්‍රශ්නයකි.

"ඔයා මාර පොරක්නෙ, විඥාණවාදය කියන්නෙ මොකක්ද කියලා දන්නෙ නැතුවද ඔයා මෙච්චරවෙලා කතා කරපු දේවල් අහන් හිටියෙ? ඔයත් නිකන්............."
ගුරුවරයාගේ හිස වටේ Tweety Birds ලා පියාඹයි. අතරින් පතර වල්ගා තරුද කඩා හැලේ.බිව්වට වඩා දැන් මට වෙරිය.

අවසානයේදී දීප්තිද මොකාද කියා දීප්තිවද අදුනන්නේ නැති විදියට හැසිරුණු අපේ කාලයේ වීරයා ජයග‍්‍රහණය කළේය. අන්තිම shot එකද එක උගුරට හලා ගත්තේය. මටනම් මෙය රසගුලාවකි. බයිට් පිගානේ මුහුණ ඔබාගෙන තනිවම සිනාසේ.

දැන් අපේ going away එකය.අයෙක් බදා සිපවැලදගන්නා විට අයෙක් අතේ තිබෙන සිගරට් එකද උදුරාගෙන යන තරමේ දෝරෙ ගලායන සෙනෙහසින් අප පිටව ගියෙමු.
අනේ එවන් සුන්දර රාත‍්‍රියක් ගෙවුණු ඉක්මන !!!

*****

පසුදා උදෑසනින්ම ජංගම දුරකථනය බෙරිහන් දෙන හඩය.

"මචං අයිවන්ව ඊයේ රෑ arrest කරලා කියලා ආරංචිද? "
මගේ නිදි විකාර ගතිය කොහෙන් ගියාද නැත.

"නෑ බං මම දැනුයි ඇහැරුනෙ...ඇයි මොකද වෙලා තියෙන්නෙ? "

"දන්නෑ බං.. උගෙ phone එකත් off,පොඩ්ඩක් හොයලා බලහන්කො.."

හැරෙන තැපෑලෙන් මම පෙරකී ගුරුවරයාට ඇමතුමක් ගත්තේය.

"සර්.. ඊයෙ මෙහෙම සිද්ධියක් උනාලු, ඇත්තද බොරුද දන්නෑ "

"නෑ.. නෑ.. කලබල වෙන්න දෙයක් නෑ. මටත් ඊයේ
රෑම ආරංචි උනා. මමත් හිතුවෙ බොරුවක් කියලා..
පස්සෙ හොයලා බලද්දි බයික් එකේ ලයිසන් නැති නිසා මිනිහව අල්ලලා.කෙසෙල්වත්ත පොලීසියෙ හිටියෙ. මමයි මිලානුයි ගිහින් පුද්ගලි
ඇප දීලා මිනිහව එළියට ගත්තා"

"
ඉතිං ඊයේ මොකද වෙලා තියෙන්නෙ? "

" ඊයේ මිනිහට හොදටම වැඩියිනෙ. මදුරුවෙක්ගෙන් ගිහින් තියෙන්නෙ. යද්දි Traffic පොලීසියෙන් අල්ලලා. හෙල්මටුත් නෑ. No: Plate ඇත්තෙත් නෑ. පොලීසියෙන් ඒවා කෝ කියලා ඇහුවම මදුරුවන්ට මොකටද ඒවා කියලා අහලා. දැන් ඒ නීතිය වෙනස් කරලානෙ බං.. ඒක ඌට කිව්ව
කොහෙද වෙනස් කරලා තියෙන්නෙ වෙනස් කරලා තියෙනවානම් පෙන්නන්න කියලා ගේම ඉල්ලලා.. කතාව දුර දිග ගිහින්.."

"ඉතින් ඒ නීති කොහොම උනත් මේකා බීලා ඉදපු එකම ඇතිනෙ"

"ඒකනෙ බං කියන්නෙ එතනත් විඥාණවාදය කතා කරන්න යන්න ඇති.අනික ඊයෙ සිකුරාදා, ඊයෙම මිනිහා ගත්තෙ නැත්තන් සදුදා වෙනකන්ම ඇතුලෙ.
ඒමදිවට මම බයේ හිටියේ ඊයේ අතනින් යන වෙලාවෙ මිනිහා මට කිවුවා, ඔතපු කූරු දෙකක් තියෙනවා කියලා. මම හිතුවෙ ඒවත් මාට්ටුද දන්නෑ කියලා, වෙලාවට එහෙම හෙණයක් පාත්වෙලා තිබ්බෙ නැහැ..."

"හොද වෙලාවට... කොහොම හරි කමක් නැහැ දැන් මිනිහට ප‍්‍රශ්නයක් නෑනෙ, එහෙනම් එච්චරයි"

********

නැවත මම මුලින් පණිවුඩය දුන් මිතුරා ඇමතුවෙමි.

"මචං ඌට අවුලක් නැහැ ඊයෙම එළියට අරන්"  මම කීවෙමි.

ඊළඟට මට ලැබුනෙ හරි අපූරු පිළිතුරකි.

"ඔවු බං මම දැන් ඌට ගත්තා. ඌ කිව්වා අවුලක් නැහැ කියලා. ඌ අදුනන ලෝයර්ස්ලා ඉන්නවනෙ. උන්ට කතා කරලා වැඬේ ගොඩදාගත්තලු. ලෝයර් කෙනෙක් ඇවිත් ඇපදීලා ගත්තලු. ප‍්‍රශ්නයක් උනේ නැහැලු "
දැන්
Tweety Birdsලා පියාඹන්නේ මගේ හිස වටේය..

"මොකක්? උගේ මොන ලෝයරයෙක්ද? ඊයේ අපේ මිලානයයි, විමල් සර්රුයිනෙ ගිහින් පුද්ගලික ඇප දීලා අරන් තියෙන්නෙ"

"ආ....."


- නිරෝෂ් මෛත‍්‍රි -
2012/04/22


Saturday, April 21, 2012

සමාවෙන්න





සමාවෙන්න මට !
- මට දැන්  ඕක කියන්න එපා..
ඇයි ඒ ?
- ඔයා  ඕක කියලා කියලාම සමාවෙන්න කියන වචනෙත් බාල්දුකරලා තියෙන්නෙ.
එහෙනම් මම මොකක්ද කියන්න  ඕනෙ ?
- සමාවක් ඉල්ලන්න  ඕන වෙන්නෙ නැති තැනට වැඩ කරන්න.
හරි මම මීට පස්සෙ එහෙම කරන්නම්.
- කී දවසකටද ?
හ්ම්ම්...
- උත්තරයක් දෙන්න බැහැ නේද ?
ම්ම්ම්...
- කමක් නැහැ ඔයා දිගටම සමාව ඉල්ලන්න.
ඇයි ඒ ? මාත් එක්ක තරහින් නේද ?
- නැහැ හොද මිනිස්සු කියන්නෙ වැරදි නොකරන අයට නෙවෙයි, වැරදි හදාගත්ත අයට.
ඔයාට හොද අවබෝධයක් තියෙනවා.
- ඔයාගෙන්ම තමයි ඒක ලැබුනෙ...


  - නිරෝෂ් මෛති‍්‍ර -

ළගදි ගත්තෙ වද්දන්න එපා




රොබට් සෙමාකිස්ගේ (Robert Zemeckis) Forrest Gump චිත‍්‍රපටියේ ප‍්‍රධාන චරිතය වූ "ගම්ප්" නම් පුද්ගලයා කිසිදු දෙයක් වටහා ගන්නට උත්සහ නොකරන්නෙකි. අවට පවතින සමාජ යථාර්ථය කෙරෙහි ඔහු දක්වන්නේ බිංදුවේ ප‍්‍රතිචාරයකි. වරක් ඔහු ඇමරිකාව වෙනුවෙන් වියට්නාම් යුද්ධයට බැදී සටන් කරයි,තව වරක් ඔහුව ඇමරිකන් ආණ්ඩුව පිංපොං බෝල ගැසීම සදහා චීනයට යවයි,ඔහු ආදරය කරන පෙම්වතිය වියට්නාම් යුද්ධයට එරෙහිව පෙළපාලිවල ගමන් කරන්නියකි,ඇයට ඊට අමතරව AIDS වැළදී ඇත.වියට්නාම් යුද්ධය,චීනය, AIDS යන මේවා ඓතිහාසික සිදුවීම්වන අතර ඒවා අතර විශාල වෙනස්කම් පවතියි.නමුත් ගම්ප්ට අනුව ඔහුට මේවා අතර වෙනසක් නැත. වියට්නාම් යුද්ධයේදී සටන්කරන ඔහු ඊට ප‍්‍රතිපක්ෂ ස්ථාවරයක සිටින තම පෙම්වතිය විවාහ කර ගැනීමේදී ඒ ගැන කිසිවක් නොඅසයි.
            මෙම චිත‍්‍රපටිය හදිසියේ මතකයට පැමිණියේ මගේ මිතුරෙකුගේ සටහනක් අන්තර්ජාලයේ අහම්බයෙන් දැකීමෙනි. එය කියවා අවසන් වූ පසු මට දැනුන එකම කරුණ නම්,යම් ස්ත‍්‍රියක් අරඹයා ඔහු පැටලී ඇති ග‍්‍රස්ථිය සුළුපටු එකක් නොවන බවයි. විටෙක සදාචාර සම්පන්න සමාජයක් ගැන කතාකරමින්,තවත් විටෙක අරගලයක් සිත තුළ නළියෑම පිළිබදව සිහින දකිමින් ඇතැම් වගඋත්තරකරුවන් ලේ නෑයින් වූ විට ඔහු දක්වන්නේ බිංදුවේ ප‍්‍රතිචාරයකි. එවිට අයෙක් පිළීබද අන්ධ භක්තියකින් පෙළෙන ගමන් කුහකත්වය,මූනිස්සම්,සල්ලි ගහේ නැගීම, නම් කැපීම,සැරව ගැලීම යන විසම්භන්ධ වචන රැසක් (ඔහුගේම වචනවලින් නම් රැප් ගීයක ආකාරයෙන්) එක පෙලට ගායනා කරයි. නමුත් සැබෑ ලෝකයේදී සිදුවී ඇත්තේ අනෙකක් බව තේරුම්ගැනීමට තව අල්ප කාලයක් පමණක් ඔහුට ප‍්‍රමාණවත්ය. යථාර්ථය (Reality) යැයි මිනිසුන් තේරුම් ගන්නේ ඔවුන් දකින්නට කැමති දේය.එයට පරිබාහිර දෙයක් සිදුවන විට ඔවුන් හැසිරෙන්නේ උන්මත්තකයින්ටත් අන්ත ආකාරයකිනි.ඇතැම් විට යථාර්ථය මෙය බව දැන දැනත් යථාර්ථයට වඩා ඇලී සිටින (තාවකාලික උවත්) මායාව ආශ්වාදනීය බැවින් ඔවුහු මායාවට පෙම්බදිත්. එබැවින් එම ස්වයං වින්දනය වෙනුවෙන් ඔවුන් අවිචාරව පෙනී සිටියි.නමුත් එතැනින්ද නොනැවතී මා මෙන්ම ඔබද මේ ස්වයං වින්දනය වෙනුවෙන් හඩ නොනගන්නේ ඇයි දැයි අසයි.
            එඩිත් වෝටර්න්ගේ (Edith Wharton) The Age of Innocence නවකතාවේ හරය මෙම තත්ත්වයට බොහෝ සෙයින් සමපාතය.
එහි කතානායකයාට ඉහළ පන්තියේ කාන්තාවක් සමග අනියම් සම්බන්ධතාවයක් තිබෙන බව ඔහුගේ බිරිද හොදින්ම දනියි.නමුත් ඔහුට එවැනි සම්බන්ධකමක් නැතැයි කියා ඇය විශ්වාසකරන අතර ඇය ජීවත්වන්නේ තම සැමියා ඉතා යහපත් පුද්ගලයෙකු කියා සලකාගෙනය. ඇගේ මෙම තර්කය නිසා ඇය අවට යතාර්ථය ඉතා හොදින් කි‍්‍රයාත්මක වෙයි. ඒ අනුව ඇගේ විවාහය යනු සැබෑ ලෝකයේ පවතින දෙයක් නොව ලෝකය ඉදිරියේ පවතින ප‍්‍රබන්ධයකි. නමුත් ඇය එම කටුක ඇත්ත ප‍්‍රතික්ෂේප කොට එවැන්නක් සිදුවී නැතැයි සිතා කි‍්‍රයාකරයි. එතැනදී ඇයගේ විවාහ ජීවිතය පමණක් නොව සමාජයෙන් වෙන ගැරහුම්වලින්ද ඇය ආරක්ෂාවෙයි.කිසිදු දෙයක් සිදුවී නැතැයි යන යථාර්ථය බැහැර කොට ඇය නිර්මාණය කරගන්නා ලද ෆැන්ටසිය තුළ සතුටින් ජීවත්වීමට උත්සහ කරයි.
            ඉදින් සැබවින් නොපවත්නා යමක් රැක ගැනීමට පුද්ගලයෙකුට අපමණ වෙහෙසක් ගැනීමට සිදුවීම,පිටතින් බලා සිටින කෙනෙකුට අසිත තවුසා සිහිපත් කරන්නකි. මන්ද එකවර සොම්නස මෙන්ම දොම්නසද පහල කරන බැවිනි. ඔහුගේ සතුට රැදී තිබෙන්නේ යථාර්ථය බැහැර කරන තෙක්ය.ඔහු තමන් පරමාදර්ශී චරිතයක් බව සිතන ගමන් තමා වටා ඇති සංකේත චරිත  රැකගැනීමට ගොස් පුද්ගලයන්ට පොදු විනෝදාස්වාදයද සපයන්නේ නිරායාසයෙනි. එවන් අයෙක් පිළිබදව අනුකම්පා කරනවා හැරෙන්නට වෙන කලහැකි යමක් නැත.
ඉදින් යහපත් මෙන්ම බුද්ධිමත් අනාගතයක් වෙනුවෙන් එවන් මිනිසුන්ට පුණ්‍යානුමෝදනා කරමු.


- නිරෝෂ් මෛති‍්‍ර -
2012/03/01

හෘද සාක්ෂියක් කී කතාවක්



ප‍්‍රතිඵලය:

මට බොරු කියන්න බැරිවීමේ විපාක කර්ම ඊයේ හොදහැටි පඩිසන් දුනි.
කියූ බොරුවක් Creative නොවීම නිසාත්, හරස් ප‍්‍රශ්න ඇසීමේදී උපමා, රූපක යොදා බොරුව හැඩ කිරීමට නොහැකිවූ නිසාත්, කරමුලටම හිරවුණි.
මුග්ධ මිනිසෙක් ලෙස මා ජීවත්වන්නට උත්සහ කලත් තවමත් මා තුළ වියැකී නොගිය ගුණයහපත්කම් තිබෙන බව පෙරදා රැය මට කියාදුන් පාඩමයි.

හෘද සාක්ෂියේ සටහන:

හොද ගුණ යහපත් මිනිහෙක් ලෙසත්, බොරුකියා අනුන්ව රවටා ජීවත්වන පවුකාරයන් පිළිකුලෙන් යුතුව හෙළාදුටු යුගයත් මීට වසරකට පමණ පෙර අවසන් විය.
ඉන්
පසුව බිහිවූයේ දෙබිඩි මිනිසෙකි. ඔහු පව පින ගැන ඒතරම් තැකීමක් නැත.
උදාහරණයක්
ලෙස පොහොය දිනයේ ගල් වලේ (ගල්වල යනු අත්හැර දමා ඇති ගල් වැඩපොලකි) සෙට් වී සිගරට් උරණ, ගංජා ගසන, අරක්කු බොන සිය යහළුවන්ව ඔහු දුටුවේ දේවදත්තලා මෙනි. (ගල්වලට ඉහලින් කෙලින්ම දිස්වන්නේ ගමේ පන්සලේ චෛත්‍යයවීම ඔහුගේ සිත තවත් සංවේදී කෙරිණි)
නමුත් පසුකාලීනව දෙබිඩි මිනිසා පොහොය දිනයේ බාර් වසා දැමීම පිළිබදව ආණ්ඩුවටත්, රට කරවන ඇත්තන්ගේ මව් පාර්ශවයන්වලටත් නිතර දෙවේලේ පුණ්‍යානුමෝදනා කරවීය.දෙබිඩි මිනිසා ඉන්ද නැවතුනේ නැත. අදටත් බොරු කිරීමේ හසල දැනුමක් ඔහුට නැතත් (ඇතැම් බොරු අතේ පත්තු වූවත්) ඔහු දිගටම බොරුකීය.
විශේෂයෙන්ම කාන්තා පාර්ශවයටය.මන්ද එම සත්වයා කෙරෙහි වූ විශ්වාසයේ අගය දිගින් දිගටම සෘණ අගයක් ගත් බැවිනි.
නමුත් එයට හේතුවක් විය. පෙරසිටි බෝසත් තරුණයා ඇත්තෙන්ම අහින්සකයෙකි. ඔහුට තිබුන මූලික දුර්වලකම නම් නිතර කිපීම පමණි.
එමෙන්ම ඔහු අවංකයෙකි.එබැවින් එහි අතුරු පලයක් ලෙස ඔහු පුද්ගලයන් ඇදහූ මෝඩයෙකුද විය. එම නිසාම ඔහුව කඬේ යවා විනෝදාස්වාදයක් ලැබූ පුද්ගලයන්ද මේ අතර විය.

කාලය අතර හමා ගිය චණ්ඩ සුළඟකින් බොහෝ දේ උඩුයටිකුරු විය. ඉන් බෝසත් තරුණයාගේ සිත තව තවත් කිළිටිවී කෙළෙස් සතුරන් වර්ධනයවිය. ඔහු දැන් තවදුරටත් සිරිත්මල්දමේ සිරිමත් නොවේය. ඔහුට අනුන්ගේ දුකක් නොදැනෙයි. දුරකථනයෙන් ඔහු අමතා තමන්ගේ දුක කියනා ගැටිස්සියන්ට ඔහු සිනාවිය.
"
ඔයානම් මහ ගල් හිතක් තියෙන කෙනෙක්, තකහනියක් ඔයාට call කරලා මේවා කියන මටයි ගහන්න ඕනෙ" යන දෙබස් ඔහුට කටපාඩම් වන තරමට නිතර දෙවේලේ ඇසුණි. නමුත් පුදුමය නම් නැවත නැවතත් ගැටිස්සියන් ඔහුටම දුක කීමය. එයටද හේතුවක් විය. එනම් ඔහු ඉතාමත් මිත‍්‍රශීලී පුද්ගලයෙකුවීමයි. ඔහු (අභ්‍යන්තරයෙන් දැවුනත්) නිතර පී‍්‍රතියෙන් සිනහවෙන් දිවිගෙවන්නට තැත්කිරීම ඔවුන්ට පි‍්‍රය වන්නට ඇත. විහිළු කිරීම, කට කැඩිච්ච කතාවක් කීම ඔහුගේ අනිවාර්ය අංගයකි. හෙන ගැහුවද සතුටින් සිටීමට ඔහුට ආභාෂය ලැබුනේ පැරණි පෙම්වතියකගෙනි. (ඇය පිළිබද විශේෂ සටහනක් ඉදිරියේදි බලාපොරොත්තුවන්න)
ප‍්‍රශ්නවලින් මිරකී සිටින්නෙකු බොරුවට හෝ සතුටින් ජීවත්වන්නේ කෙසේදැයි ඉගැනීමට අවැසිනම් ඇය පරමාදර්ශී චරිතයකි.
ඇයගේ වියෝව දෙබිඩි මිනිසාව තව තවත් මුග්ධ කිරීමට බලපෑවේය.
ඔහුගේ සිතින් අනුකම්පාව වියැකුනේ බලාගෙන සිටින විටය. ඔහු සහෝදරියක් මෙන් ඇසුරුකල තැනැත්තියක් ඔහුට වංචා කල පසු නිර්දය ලෙස ඇයව ඉවත දැමුවේය. දැඩිව ආදරය කල තරුණිය නොමැතිව දිවිගෙවන්නට හුරුවිය. ඉන්පසු ආදරයක පැටලෙන්නට බලෙන් ඇගේ එල්ලෙන අයට සිත්සේ වංචා කළේය. නමුත් දෙබිඩි මිනිසා ප‍්‍රතිපත්තිගරුක මිනිසෙකි. ඔහු තමන්ගේම මතයක පිහිටා කටයුතු කරයි. ඔහුට දේශපාලනයක් ඇත. සමාජය, පුද්ගලයින්, ආදරය, විරහව වැනි කාරනා පිළිබදව ඔහුගේම විවේචන ඇත. ඔහු ඒ වෙනුවෙන් හැකි සෑම විටම පෙනී සිටියි.

නමුත් ඔහු තවමත් දෙබිඩි මිනිසෙකි...




- 2012/04/21 -
නිරෝෂ් මෛති‍්‍ර 


 

Sample text

Sample Text